हिंमत द्या थोडी

हिंमत द्या थोडी

नका नाका मला
देऊ नका खाऊ ,
वैरी पावसानं
नेलामाझा भाऊ

महापूरामध्ये
घरदार गेलं,
जुल्मी पावसानं
दप्तरही नेलं

भांडी कुंडी माझी
खेळणी वाहिली,
लाडकी बाहुली
जाताना पाहिली

हिंमत द्या थोडी
उसळू द्या रक्त,
पैसाबिसा नको
दप्तर द्या फक्त.
..................................

सहावीच्या पाठ्यपुस्तकातील अशोक कौतिक कोळी यांची कविता मला भावली म्हणून तुमच्या समोर आणली.महापूरामध्ये सारकाही गमावलेल्या मुलीची शिक्षणाविषयीची तळमळ यात दिसते.
................................................................................................................